Hobi Yang Dah Ditinggalkan

                                                                 

 Hobi den suko nyolam. Den nak cito sikit tontang hobi den ni.

Monyolam memang dah lamo den suko. Pado den umo soboleh taun laie den dah mula nyolam, tapi bukan kek laut haaaa. Tapi kek lumbong tingga kek blakang umah den.

Tiap potang den poi ngan kenkawan den ko lumbong tu. Den bukak baju tingga suar dalam jooo, toghuih den panjek pokok kek topi lumbong tu. Den menghaung cam Tazan. Den ghasokan saolah cam Tazan .

Umang haii den menyolam cari ikan. Den tau ado oghang pasang lukah kek topi lumbong tu, seko seko den ambik ikan dalam lukah tu. Kawan den kato " Umang hai ikan kek dalam air pun kau dapek cokau yoooo"

Itu cito maso den kocik.

Bilo dah bosa dan tuo ni lain lak cito dio eh...

Agak- agak dalam tigo taun dolu aden slalu poi kek laut Pot Deksen kek topi pantai dokek kapa belaboh tu.

Mulo-mulo den blaja nyolam ngan tabung ges. Kali petamo, tak dapek nak nyolam sobab buntut den teghapung. Pueh cikgu nyolam tu aja den.

Diikeknyo den kek dalam air. Dokek nak satu jam den dalam air. Den ghaso cam  ado joghong kek topi den. Takut bona ghaso eh.

Bilo dah pandai, gian lak den nak poi slalu. Makin lamo makin jauh ko dalam den nyolam. Tapi yang tak sodap eh, bilo dah dalam bona tu dado den sakit. Maklum la den penyolam paling tuo dalam grup tu.

Bini den pun melete sobab den sakit dado. Dio tak bagi laie den nyolam.

Apo nak buek an. Don tepakso lupokan hobi den tu. Sodih bona ghaso eh tak dapek menikmati keindahan kek dalam laut.

Sekian yo lah cito den...pokok dek kau la nak cayo ko tak.