Minyak Naik?

Heboh seantero tompek minyak naik duo puluh sen. Ponuh stesen minyak dengan keto yang beratur panjang. Den ponek nak poie beratur, jadi tak adolah den turut memeriahkan pesta meraikan kenaikan hargo minyak tu.

Apo nak buek. Lopeh ni den naik beskal poie pejabat. Mulo jam nam setongah pagi, sampai sanun jam limo setongah petang. Habis maso kek jalan yo. Boleh gitu?

Bini den selambo yo minyak naik. Den pun polik. Jenuh den memikir pasal apo dio diam tak do la bising-bising bona. Lamo-lamo barulah den perasan, dio tak do keto. Keto dia den pakai. Keto den lak, anak den pinjam sobab eh keto anak den dalam bengkel. Dilanggarnyo belakang lori. Tah hapo-hapo anak den tu.

Semuo bondo naik sekarang ni. Maknonyo kito ni kono tanam seniri sayur-sayuran, bolo ikan, ternak ayam, tanam bawang...

Jawapan bini den sonang yo kalau ado oghang yang bagi cadangan macam tu.

Dio kato, "abah kau..."

Tup-tup semalam, lagi sekali den polik. Daripado sonyap tak komplen, semalam bukan main bising lak dio pasal minyak naik. Nasib baik telingo den ni tak berapo nak donga. Sekali lagi den berfikir kenapo dio berubah seratus persen. 

La...ghupo eh, dio dah dapek keto baru. Maknonya dio dah ado keto semulo. Maknonyo lagi, kono isi minyak keto dio tu. Patutlah bising semacam.

Dunio dunio...pokok dek kau lah!

Dah Bersawang Blog Den

Pojam colik pojam colik, dah nak sampai bulan poso. Ado lak bola pialo dunio.

Cam biaso, benanah telingo den donga bini den beleter. Pokak telingo den ni ha. Apo nak buek, tahan yo lah. Lamo bona den tak apdet blog ni. Ponuh sawang. Den sibuk bona. Tak sompek nak nulih apo pun. Pastu den dah tuo, ponek manjang.

Apo pun den nak ucap selamat nyambut bulan poso kek semuo. Jangan monteng. Kito ni ontah jumpo ko tak ngan Ramadan taun dopan.

Den nak tido dulu yo. Karang nak nengok bola lak.