Kecek Kelate

Pokok dek kau lah nak kato apo, den tak ghoti bahaso kau. Macam itik ngan ayam yo. Kalu ekau ngumpek den pun den ingat ekau puji den.

BSCHKTS

Keto kuning den

Apo itu BSCHKTS?

Silo angkek tangan kok ado yang tau menjawab.

Den dah ajar apokah maknonyo istilah tu. Kono hapal boto-boto sobab eh, den nak tanyo dalam ujian. Den dah bagi soklan boco ni. Jangan lak tak baco nota.

Adopun BSCHKTS itu berkaitan dengan keselamatan jalan ghayo. Jiko kito mandu, semuo derio kono awas. Mato mandang, telingo mendonga. Kaki tangan pun samo. Minda jangan merayap jauh sampai Amerika.

Den teringat. Semalam tibo-tibo bini den mengadu. Dia mandu di Slim River. Tibo-tibo ado kilat. Dio sakit ati sobab dio mandu 80 kilo di lorong kiri. Apo pasal kono amik gamba lak? Glamour bona ko? Itu dio yang komplen kek den. Takdo tu, den kato. Barangkali kamera tu amik gamba keto lain.

Cito pasal kilat AES tu takdo kaitan dengan BSCHKTS. Tapi den puji gak la bini den sobab selalunyo dio mandu ngalahkan mat rempit. Semalam dio kato dio mandu perlahan, siap buleh amik gambar pemandangan dari dalam keto. Tah hapo-hapo, ikut suko ati dio yo. Jiko dio ghaso nak “mengembaro”, dia setat enjin keto, dio mintak izin den pastu dio jalan yo.

Banyaklah dio punyo mengembaro. Ado ko patut dio mengembaro sobab nak gi cari sireh pinang kek utaro nun. Macamlah kek Nogori Sombilan tu pinang sireh tak sodap. Polik bona. Bini camni pun ado. Dah tuo-tuo pun cam tu gak. Suko bona buat saprais (surprise). Nasib baiklah den ni takdo sakit jantung.

Tapi den totap setio, walaupun dio suruh den kawin laei. Emang polik bona bini den tu. Montang-montang den dah tuo. Kalu mudo, takdo do dio menawarkan den buko cawangan hahaha...

Sebonanyo, tak sompek den nak mikir bondo-bondo gitu. Kojo den sibuk. Lagi pun bini den tu oghang putih kato, “the best in town”. Kombang idung dio kalu baco apo den tulih ni...

Err...kembali semulo kepado soklan den tadi.

Apokah makno BSCHKTS?

Buko balik nota dan baco!