Gembironyo Bebuko

Hai nak buko pun tunjok pis. Tah hapo-hapo budak-budak ni.

Bulan Poso

Gini lah ghupo  kengkawan den di tompek kojo maso rehat.

Yolah tompek ado ekon sodop lah dio lepak. Den posan pado dio orang
jangan asyik cerito tontang makan yo.

Ado lak yang jawab bulan poso ni amat loteh. Eden koba kan pada mereko jangan salah kan bulan poso, nanti tak dapek pahalo lak.

Mereko bincang nak buko di sini nak ambil bubor lambok dan nasik ambang, pocumo yo di masjid
Sultan Selangor di Pulau Indah tu.

Sakit tapi SONYUM

Yang sorang ni lagi sodap ditengok, Dah lah kono langga belakang lori. Bilo den ambik vidio dio boleh SONYUM lak tu.....Tulah deh MINAT SONYUM.........Botuwah lah laki dio tu dapek bini goma sonyum.

Sakit sonyum, kono marah sonyum... Hai minat sonyum, mati aka lah dibuwek dongan dio ni.


(Lakonan sahaja)

MINAT

Minat ni memang dah ado dalam sanubari kito. Minat ni memang tiap orang misti ado. Dah den koba kan dulu minat bola.

Makan bola, tido bola, minum bola, nak toberak pun tongok bola haaa ini dah parah dah tu. Cada dan sarong bantal pun bola. Polok lah banta tu....... Kalau dah minat bona moncungap putus urek kontot pun dio buek jugo...... kalau bini den marah den buek pokak joooo janji den dapek tengok dan buek...

Haaaaaa ini den nak koba kan pada kau, Minat SONYUM........

Dah togolek anjing di loboh ghayo pun sonyum.....Minat sonyum....hehe mat rumpit niiiii. Ado pun dio ni digolakan MAT SONYUM.

Buko dongan kawan2

Ini lah ghoman eh den buko poso di tompek kojo den.

Macam macam kueh dan makan ado kawan bawak.....

Yang sodap tu buko orang tak poso..... macam poso sabulan nampak eh, kuek lak mentedarah.... yang elok eh dio tu boli macam2 juwadah........ agak eh nak baleh balik doso dio tak poso.......

Pasokan Bola Den

Kalau dah kato minat tu, apa jo yang ado kito kono buek.

Kalau minat bola kito kono ado pasokan atau pemain kan?

Kalau kito minat pancing ikan, misti ado joran.

Kalau ado minat momburu misti ado sonapang, satidak tidak eh lombing atau panah.

Kalau kito minat minat bitino, misti pandai temberang kan, pombongak maknusio.

Kalau kito minat monyolam porot jadi boyot kan...ia lah dek totolan air jooooo

Inilah pasokan bola di mano den adalah pengurusnyo.

MINAT .........apo dio......nanti den koba kan yoooo kalau nak kito kono baco lain kali. Kali ni memang bes den nak kobakan.......

Den Goma Nengok Bola

Tengok...jangan tak tengok!

Ado pun, sojak maghen, sojak daripado den taim kocik-kocik laie, den emang goma nengok bola. Sojak azali!

Tapi ontah apo la nasib den, bini den anti bola.

Ado ko patut dio nak buek macam yang kek dalam gamba tu?

Dio nak bolikan bola, lotak topi dinding, lopeh tu nak sughuh den nengok bola tu pueh-pueh. Amek kau, kata dio!

Kono caghi lain la jawab eh...

Bukan bini...tapi hobi lain...hehehe...

Kang tak pasa-pasa, den kono makan nasik lauk bola...

Nyareh Kono Komalangan

Tersadai kek topi jalan lori sapo tah

Donga boto2 apo den nak posan

Pado minggu lopeh 11hb Jun 2013, den buek in-cab ko Cameran bersamo pemandu. Den aja dio ko sano, namo dio Kamaruzaman. Pado jam 03.45 pagi den dongan dio membuek toolbox miting dulu, lopeh tu den torus lah bogorak ke sanaun... sampai jo ko R&R Rawang ampir jam 05. 20 am, den tunggu masok solat suboh den dapek minum Kopi Jantan dan Nasik lomak.  Lopeh tu den solat dongan pemandu tu. Doa mintak selamat poi dan balik.

Bilo sampai jo di R&R Tapah lobeh kurang jam 07.20am kito kono boronti salamo 25 menet, ini ado lah peratoran. Dalam polajaran kono buek sobab bilo nak naik bukit kito kono boronti dulu, tengok taya, tengok dopan dan bolakang dulu kok ado yang tak kono, macam taya melepek, lampu bal tobaka ko tu sumo kono lihat bak kato macam "ROTA A".

 Bilo lopeh tol Tapah, den dah mulo baco doa banyak2 sobab kalau ingat  kan powi dek manpus pun den tak nak buek kojo ni..... Den buek SMS kek beni den..... kok ado doa pado dio..... orang tuo kato doa bini adalah makbol.

Samapai jo satu tompek tuuuu, den dah raso akan belaku den toruh ambik komero den.

Memang bona apo makripat fikiran den, ado keto polis, lopeh tu lori sayo dongan doreh. Eden dah raso kono langga dah, den raso sojuk badan den.......kerano apo kono angin bukit lahhhhhh.

Eden raso bosuko kopado- Nya, membori kocokapan dia pandu yang den aja salamo niiii, (tak mogah dooooo) lopeh tu den sampai di Ringlet, lopeh tu den balik.... sampai di Kolang jam 15.45pm ampir duo boleh jam den kojo.

Dalam pejalanan kat sanun banyak den jumpo, lori tobakar lah, lori jatoh lah, haooooo banyak bona komalangan kek Malaysia niiiiii. Ponek den .......

Kalau nak ka sanun aden posan pandu lah dongan baik baik dan jangan leko makan dalam keto dan jangan gadoh gadoh nak copek sampai yooooooo.

Guno kan Teknik L.O.V.E yooooo.

Monyet Khinzir

Dijolirnyo lidah kek den...adoi...

Ini kobon den, den tak ghoti lagi nak buek camano nak ngalaukan porosak pokok den tanam. Ado duo maklok Allah yang suko rosak an apa jo den tanam. Khinzir dan borok utan.

Den dah buek macam macam nak elak kan borok tu.

1. Den buek lambago macam orang. Monyet mulo mulo takut lopeh satu minggu dia tenggek ateh bondo tu.

2. Den boli ula sawo plastik den lelet kan di pokok compodak den. Dalam saminggu jooooo dio main kan ular tu, dan putus putus kan pulak.

3. Den  perangkap,dapek lah seko. Den spray kan di badan nyo macam rimau bolang bolang, muko nyo den spray cat puteh... den lopeh kan dio...boketenteng dio keluar pogi dongan kawan nyo, bokocapuh kawan kawan nyo lari, agak he ghoman kono spray tu macam antu agak he. Dapek lah sabulan jooooo aman, lopeh tu eh datang lagi ramai lak dio.

4. Orang kato boli rimau yang bosa tu, itu pon ditenggek tenggek he, di kudo kudo nya sampai tuburai kekabu rimau tu.

Tak tau lah nak buek cam no.

Musoh yang satu lagi Khinzir.

1. Den kopong dongan paga kawat, di sungkit heeee
2. Den spray dongan minyak anai yang busuk tu, tak di apek heeeee, memang khinzir tu busuk kan.
3. Kali ni den tabo kan rambut yang den ambik di kodai gunting lak, cubo cubo.lah
4. Kalau tak bojayo kono boli dawai karan lak. Padan dongan muko dio

Yo Ko?

Gambar usik pokok semalu ni takdo kaitan ngan cito den

 Oghang pompuan ni emang polik.

Ado oghang-oghang pompuan kek pejabat den cito hal camano sakit ati dio sobab apabilo dio bercerito, laki eh buek tak ghoti yo.

Den pun tingat kek bini den. Camtu gak ghoman dio. Apabilo den balik kojo, dio pun sibuk melaporkan daripado A sampai Z. Den dah ponek, den jawab “hmm...hmmm” kan yo. Ghupo eh dio tak pueh ati den jawab gitu. Kato dio, patutnyo den jawab “yo ko?” tanda eksaited donga dio bercito.

Apo laie. Den pun dengan eksaitednyo jawab “yo ko?” tiap kali dio abih cito. Dio cito, den jawab gitu. Dio cito den jawab gitu, begitulah seterusnyo. Tibo-tibo den kono tumbok, pelan je la. Tumbokan manjo. Tak pueh ati gak dio, sobab dio kato tak yahlah toghok bona, takkan la semuo bondo den jawab gitu. Molobih-lobih eksaitednyo, dio kato.

Poning kepalo den. Semuo serba salah dibueknyo. Aduyai bini den...