Ado ko patut bini den koba an, musim oghang main bola ni dio macam teghaso kughang kasih sayang!
Nak buek camno laie, den memang goma tengok bola. Den bukan tak kesian dio tekobil-kobil tengok den jeghit kuek-kuek bilo si ronaldo tu jaringkan gol. Bini den diam yo. Apo baghang tengok bola sopan-sopan camtu. Oghang tengok bola dengan ponuh somangat, dio tengok macam tengok drama sodih!
Aduyai, sompat laie dio komen, pemain tu mesti malu sobab eh tak dapek jaghingkan gol. Pastu ado ko patut dio tanyo den soalan yang payah boto den nak jawab. Dio tanyo, "kalau tongah main kek padang tu, tibo-tibo ronaldo tu sakit poghot nak gi buang air, camno bang?"
Macam-macam la bini den ni. Macam ni punyo bini pun ado!
Tapi den tak kisah lah dio nak tanyo apo pun, sobab dio bini den. Lagipun dio kelaka.
Lagi kelaka bilo dio bagi soalan maut kek den.
"Mike Tyson tu main untuk pasokan mano, bang?"
Tesembo air yang tongah den minum!
Pokok dek kaulah. Janji bini den sayang amek kek den!
